| |
|
|
Czile slów... ò mie dlô Ce |
|
|
|
Written by Róman Drzéżdżón
|
|
Starzëno 1997-2000
Róman DrzéżdżónCzile slów...
...ò mie dlô Ce
SPISËNK ZAMKŁOSCË
Czile slów...
...ò milocë
Krótczi wiérzt ò miłocë, Ò kùszkanim, Jo, jo, *** [Jô sedzã...] , *** [Chcesz?...], *** [Żdajã]
Czile slów...
...ò ti Zemi
*** [Je taczi môl...], Historëjô, Jesz dërch, Slowò
Czile slów...
...ò żëcym ë smiercë
*** [Nen môlinczi Swiat...], Mòdlëtwa za..., Pùk, pùk, *** [Nôlepi ùmrzéc...], Ach!, *** [Plënie môli czlowiek...], Chtos, Dobëcé
Czile slów...
...ò Bògù ë lëdzach
Baro krótczi pòémat ò..., Kòlibiónka dlô..., Baro krótczi pòémat ò widze, *** [Nick nie gôdôsz...]
Czile slów...
...ò jidzenim
Wiérzt ò tim, ò czim je, Dëtka gònic, Jidã, *** [...jesz rôz jidã], Ò jidzenim chlopa, *** [Jô rôz szedl...], *** [Jidze czlowiek...], Witro
Róman Drzéżdżón
Krótczi wiérzt ò miłocë
Slowa wërzeklé
Òb czas
Milotë
Znają szmak
Tegò
Czegò nie znô
Nicht
Òkróm
Ce ë mie
W ten
Miodny czas...
To je wszëtkò
Cëż mògą
W ti sprawie
Wërzeknąc
Lëpë
Ò kùszkanim
Kùsznij mie
Bò chcã
Dotëkù
Nagòscë
Twòjëch
Cëdnëch
Lëpów
Blëskòscë
Dôj mie
Chtërnô
Je
Nôlepszą
Gôdką
Ò
Miłocë
Chùtuszkò...
Jo, jo
Jo, pògôdôj so
Jô slëchajã
Pózni mòże Cë òdpòwiém
Jak mie sã bdze chca
Co, jesz Të gôdôsz?
A gôdôj, jô slëchajã
Doch do tegò móm ùszë
Gôdôsz, że glëpio gôdôm
Wiém, taczi jô ju jem
Docz tak gôdôjã?
Bò mie sã tak widzy
Cë to sã nie widzy?
Jeżlë tak, to nie slëchôj!
Ale Të doch gôdôj!
Jô Cã wiedno bdã slëchôl!
Jo, jo to je ju kùńc
***
Jô sedzã w mòjim ògrodze
Midzë bómama
Ë żdajã jaż jaczis sen sã zjawi
W mòji glowie
Ë tedë jô bdã wiedzôl
Cëż Cë rzec móm
Żebë nalezc sã w Twòjim Swiece
***
Chcesz?
Bierzë mie
Calé calo
Rãce
Szpérë
Òczë
Szadi lep
Nawetka
Mëszlë
Cë dóm
Le wara
Òd mòji Dëszë
Do czasë
Jaż ùzdrzã
Jak mie
KÒCHÔSZ
***
Żdajã na Cebie
W mòjim niebie
Wëmëszlonym
Na Twòje
Żëczbë
Tam gdze je
Sluńce mòdré
Ë miesądz
Ò sztôlce
Różë czerwiony
Tam gdze je wszëtkò
Dobré
A ni ma nick zlégò
Ni ma tam
Serca bez milotã
Cerpiącégò
***
Je taczi môl
Na Zemi
Wzérający w niebò
Òczama jezor
Òddëchający lëftã
Zelonëch lasów
Gôdający szëmã
Mòrsczich wal
Żëjący ë umiérający
Żëwòtama lëdzy
Pitôsz sã
Gdzeż to mòże bëc?
Przëslëchôj sã
Mòji gôdce
A bdzesz wiedzôl
Gdze żëc
Historëjô
Stôré mùrë
Krëją w se
Stôré gôdczi
Stôrëch lëdzy
Dôwné dzeje
Dôwnëch czasów
Ë blós òstôl
Môlinczi wid
Prôwdzëwi historëji
W ti cemnoscë
Stôrëch mùrów
Krokòwa 1997
Jesz dërch
Jesz dërch
Jedzą chléb swòji òdwieczny robòtë
Ze zbrużdżonëch rąk
Jesz dërch
Biôtkùją sã z môlim ë wiôldżim mòrzã
Na żôltëch bôtach
Jesz dërch
Cygną diôbelsczi proszk w knérë
Bë rozëmk nie zasnąl
Jesz dërch
Żëją w swòjëch biôlëch chëczach
Midzë dwòma òrzlama
Jesz dërch
Rozpòwiôdają swòją snôżą gôdką
Bë kôrt nie bëlo lózëch
Jesz dërch
Smieją sã w gãbë ùczalëch glëpków
Liczącëch czas jich kùńca
Jesz dërch
...
Żëją Kaszëbi
Slowò
Hòla!
Nie ùcékô Slowò
Ë tak
Rëbôk wëcygnie Cã
Z mòrza
Gbùr trekrã
Wëòrze z pòla
A bialka
Ùsztãpie z bùlwama
Nôlepi
Skrëj sã
W gãbë dzecy
A bdzesz achtnioné
***
Nen môlinczi Swiat
Zapisóny
Midzë wòdą a lasã
Midzë chëczą a pòlã
Wòlający
Z daleczi drodżi
Z Wiôldżégò Swiata
Wòniący
Swòjsczim chlebã nënczi
Ë mlékã wëssónym z ji piersë
Cerpiący
Jak dzeje naszëch starków
Jak zakòchóny mùlk
Nôleżący
Do Ce, mie, Waju
Do wszëtczich
Chtërny chcą kòchac
Nen môlinczi Swiat
Do chtërnégò
Jesmë zapisóny
Mòdlëtwa za...
Dëchë Òjców
Naszëch
Co sedzyta
Na mòdrëch
Blónach
Wëstrzód
Ląków
Niebiesczich
Módlce sã
Za nama
Żebë më
Sënowie
Waji
Nigdë
Nie zabëlë
Mòwë
Naji
Pùk, pùk
Pùk, pùk!!!
Chtëż tam?
To jô – Twòjô Smierc
Ach, to Të
Wlézë bënë
Sadnij so
Wëpij mòczkã
Zapalë
Dożdże sztót
Jô jesz mùszã
Pòsprzątac jizbã
Przërëchtowac pôlniô
Zaplacëc rechùnczi
A jesz tam co...
Jô zarô bdã fardich
Blós dożdże
Pùk, pùk!!!
Chtëż zôs?!
To jô – Twòjô Smierc
Ach, to Të
Wiész
Biéj, pùknij so
W jiné dwiérze
Jô ni móm czasë
Dzysô ùmierac
***
Nôlepi ùmrzéc
W kùlã szmërgnąc
Grósc slów
Zark zasëpac
Krziż pòstawic
Ë kùńc bdze
Na wieczi wieków
Zabëc ò se
Niech bdze
Wieczny wid...
Ach!
Ach! Jak
Bë so sôdl
Ë zabël
Ò tëch wszëtczich
Gòdzënach
Czedë jô bél
Ach! Jak
Bë so legl
W zarkù
Ë przestôl
Mëszlec
Ò żëcym
Ach!
Cëż to bë
Bél za
Wòlnoscë szmak
Ach! Jo!
Jô rzekl
Ë sã legl
***
Plënie môli czlowiek
W bôce ze skòrëpë
Jôjka
Pò smierdzący rzéce
Serce mô
Ë dëszã biôlą
Matczi szëkô
Blós nie wié
Że to òna
Wësla gò
W ną rézã
***
Chtos mie sã dzysô spitôl
Czedë bdze kùńc Swiata?
A jô nó to rzekl:
Kùńc bél na zôczątkù
Kùńc tam gdze czlowiek je
Kùńc wiedno bdze
Kùńc to slowò
Kùńca nie bdze
Bò pò prôwdze
Ni ma ni zôczątkù
Ni ma téż kùńca
To je blós kùńc slów
Ë tak bez kùńca...
Òdpòwiesc na pitanié Dorotë
Dobëcé
Dobëlë jesmë
Pòkònelë naszëch wrogów
Wëbilë jich wszëtczich
Terô bdzemë rządzëlë sobą
A za sztërk
Czas
Pòdzeli nasze dzecë
Pòdzeli nasze bialczi
Pòdzeli naszą zemiã
Pòdzeli naszą mòwã
Ë
Zôs bdzemë biôtkòwelë
Jaż do òstatnégò dobëcégò
Na wiedno
Baro krótczi pòémat ò...
Chtëż mie rzeczë
Czë chto wié
Co je Bògã
A co nié
Co je piesnią
Co milczeniém
Czemùż milosc
Zwą cerpieniém
Bògã
Piesnią
ë Natchnieniém?
Kòlibiónka dlô...
Spijkôj slunuszkò
Lulkôj so w blónkach
Zamknij òczka
Ë dôj pòkù
Zemi
Spijkôj miesądzkù
Lulkôj so w gwiôzdkach
Przëkrëj sã nocka
Ë nie wzérôj
W mòrzé
Spijkôj chlopkù
Lulkôj so spòkójno
Zakrëj sã spikã
Ë òstawi na sztót
Żëcé
Spijkôj wszelczé stwòrzenié
Lulkôj so wigódno
Szósti dzéń ju minąl
Niech so w kùńcu
Bóg téż sztót òdpòcznie
Baro krótczi pòémat ò widze
Bòże dôj mie wid
Abò chòc sztrëchùlce
Ë swiécã
Mie dôj
Bë mógl jem
Ùzdrzec
Kąsk dnia
Ë kąsk nocë
Chòc môli sztëczk
Żëcégò
W tim môlu ë czasu
***
Nick nie gôdôsz
Jak Cë w gãbã
Wòlają cerpieniém
Nie rikôsz
Jak zdrzisz
W dësze zbòlale
Nie smiejesz sã
Do jich òczów
Pragnącëch redotë
Nick nie czëjesz
Jak Cã proszą
Ò kąsk lëtoscë
Nick Cã ni mô
Bò jes Të
Z jiny bôjczi
Czlowiekù
Wiérzt ò tim, ò czim je
Jô chcôl jesz co napisac
Le przëszlë Strëch z Babą
Ë rzeklë ò sztëczkù chleba
Jô sã tegò spòdzôl
Bò wiedno dó miã przëchòdëlë
Miôl jem przërëchtowóny cali brót
Jak zjôdlë to pòszlë dali
Zdrzec w òczë Bòga
A mie bëlo żôl Swiata
Le wiedzôl jem terô
Cëż jô chcôl napisac
Dëtka gònic
Zabic
Zabëc
Zdradzëc
ë Zdżinąc
Pòd
Mitą
Dëtków
Wërwónëch
Swiatu
To je
Taczi
Òkrãgli
Lëdzczi
Spòrt
Jidã
Jidã stegną wracając
Nie wiém bëlno skąd
Nade mną zelony
Baldachim drzéw
Rikô nó miã
Zëmnyma kroplama
Lez
Skądkaż wracają
Dokądkaż jidą
Nie wiém
Jô so pò prostu
Jidã stegną
***
...jesz rôz jidã
bez zelony las
do môli chatinczi
mòjégò jistnieniô
... jesz rôz bómë
roscą do gwiôzd
a zelonô cemnosc
kladze mie spac
Dzysô zôs nie duńdã
Mòże witro?
Ò jidzenim chlopa
Szedl so chlop bez wies
Nicht nie wiedzôl
Skąd ë gdze
Miôl drogã
Nikt nie rozmiôl
Jegò miona
Jegò mëszlë
Nawetka slów
Òn smiôl sã
Do dzecy
Ë rozdôwôl
Darënczi
Chtërnych
Wiôldżi lëdze
Ni mòglë
Ùzdrzec w Widze
Blós dzôtczi
Co szlë
Slôde
Wiedzelë
Cëż je lós
Drzéżdżónów Janowi
***
Jô rôz szedl
Mëszlôl
Ë zabël
Jem
Ò czim
Jô mëszlôl
Òb drogã
A czedë
Je ju doszedl
To so
Przëbôczël
Blós
Drogã
***
Jidze czlowiek
Òd zôczątkù
Do kùńca
Jidze czlowiek
Rôz prosto
Rôz pòkraczno
Jidze czlowiek
Czasã Wiôldzi
Czasã môli
Jidze czlowiek
Do swòjégò Swiata
Chtërnégò wiedno szëkô
...le czë naléze?
zagùbiony Kaszi
Witro
Witro nie bdze
Na niebie
Sluńca
Nocka bdze
Do witra
A Të biéj
Do widë
(Starzëno 1997-2000)
Róman Drzéżdżón ùł sã 4 séwnika 1972 rokù w Starzënie. Terô mieszkô w Pùckù, gdze robi w Mùzeum Pùcczi Zemi. Je przede wszëtczim pòétą ë prozaikã. Swòjé dokôzë drëkòwôł w cządnikach Pomerania, Gazeta Nadmorska ë Òdroda, a téż w trzech zsziwkach Zymk – brzadach Zéńdzeniów Młodëch Ùtwórców Kaszëbsczëch Zymk. Drzéżdżón je wespółzałóżcą Kabaretu Fif (Fif òstôł ùtczony Skrą Òrmùzdową).
Róman Drzéżdżón je jednym z przédnych ùtwórców młodégò pòkòleniégò. Czile slów... to jegò pierszi zbiérk wiérztów. Òstôł napisóny w bëlôcczi gwarze kaszëbsczégò jãzëka – nôbliższi ùtwórcë.
Przygotowanie do publikacji Wydawnictwo Region, Gdynia |
|
|
Kultura / Kùltura 
Top 
